Who we are?

My photo
Giza, Egypt
Oh I come from a land, from a far away place…where a caravan camels roam...Where it's flat and immense and the heat is intense…it’s barbaric but hey...its home

8.07.2010

التويتر حلال ولا حرام فى رمضان؟


نظراً للحيرة الحامدة إللى بيقابلها زملاتنا على تويتر, فا نحب نطرح سؤال: هل التويتر حلال ولا حرام فى رمضان؟

إبن حنيل قال إن تويتر حرااااااااااام فى رمضان ويسبب الإفطار نظراً لما تتضمنه التويتات من بعض النميمة ومعلومات تساعد على قلب نظام الحكم وتحريض الشعب ضد العائلة المالكة!

لكن إبن حنيفة قال إن تويتر حلال ولكن بشروط
--------
قبل فتح جهاز الكمبيوتر أو الموبايل, يجب الإستيعاذ بالله من الشيطان الرجيم
-------
أن تكون النية خالصة للكلام فى أمور الدين وليس أمور الدنيا...يعنى مثلاً ماينفعش البنت تسأل صاحبتها حصل إيه فى مسلسل يسرا إمبارح علشان فاتتنى الحلقة! كده إنت يتعملى إعلان للمسلسل وممكن واحدة تكون ماسكة نفسها ومش عايزة تتفرج على التلفزيون ولما تشوف الكلام ده تتشد ليه وتقضى رمضان على التلفزيون بدل الذكر والصلاة
-------
يجب الفصل بين الرجال والنساء فى عالم التويتر...لا يجوز أن يتحدث الرجل مع إمرأة أجنبية (مش خواجية, بس واحدة مش من المحارم) والعكس صحيح. ولو فيه شك فى نوع أو نية إللى هتتكلموا معاهم, يبقى بلاش احسن كى نتجنب الشبهات
------
أن لا يكون الكلام على كوباية القهوة إللى مش عارفين تصحوا من غيرها ولا نفس السيجارة إللى هتموتوا عليه! خلاص يعنى كلنا عارفين إنه الصيام حاجة صعبة وإنه النيكوتين والكافيين شئ أساسى فى حياتنا علشان نفوق واليوم يظبط, بس ما باليد حيلة
-------
ماينفعش خااااااالص حد يتكلم عن الشيخ "التربو" إللى بيروح يصلى التراويح عنده! ماهو مش نعمل إعلان عن الجامع ونكون سبب فى الزحمة إللى هتحصل عنده. ياريت كل واحد يخليه فى الجامع إللى بيحبه مش الجامع إللى بيخلص بسرعة
-------
فى رمضان بس كلمة "مبارك" ترجع كلمة يمكن إستخدمها تانى. لا تحرموا ما أحله الله يا جماعة...نمشيها شهر واحد بس مافيهاش حاجة يعنى عايزيين رمضان يكون مبارك بجد مش كلام وخلاص
--------
إعملوا أن فولو لأى حد بيستخدم ألفاظ بذيئة...أصل فى ناس بقى طبع عندهم إنهم يشتموا عمال على بطال فا لازم تتجنبوا الناس دى علشان ماتقعوش فى الغلط معاهم! أصل دول ماينفعش معاهم "أللهم إنى صائم"...هيستفزوكوا يعنى هيستفزوكوا وهتشتموا شئتم أم أبيتم
-------
لا يجوز الكلام عن الأكل بتاع عزومة إمبارح عند طنط تفيدة والأكل بتاعها إللي لا يؤكل...وإنك قومت من على الفطار من غير ما تاكل أى حاجة لدرجة إنك إتلككت بصلاة التراويح علشان تنزل وتعدى تجيب أى حاجة تاكلها!! ده اكيد حراااااام, الأكل كله نعمة من عند ربنا, حتى لو طنط تفيدة هى إللى طبخاه
-------
الناس إللى بتستخدم تويتر من دول غير عربية أو إسلامية مسموح لهم إنهم يعملوا بالشروط دى لحد االعصر بس, وبعد كده ممكن الأمور تمشى عادى, مع العلم أن اكيد إللى هيعمل بالشروط دى لحد الفطار هيكون ليه الأجر والثواب
---------------------
أهم حاجة لازم كله ياخد باله منها إن النشاط الوحيد المسموح بيه فى رمضان هو النشاط الدينى وأى نشاط تانى من أى نوع يبطل الصيام...وعلى إخوانا المسيحيين, (وإللى مش إخوانى) الملحدين أو بيتبعوا أى ملة تانية...مراعاة إن رمضان أهم شهر فى السنة بالنسبة للمسلمين فا ياريت تساعدونا الله يخليكم! وكل واحد حر فى إختياراته بس المساعدة والمشاركة حلوة وأهى فرصة إن إخوانا المسيحيين عندهم صيام اليومين دول فا نقدر نشجع بعض! وياريت نرفع شعار "النشطاء يمتنعون"ا

إلى أن ناتقى بعد البقلاوة والبسبوسة والكنافة...أشوفكم يعنى مع الكحك والبيتى فور والغريبة

ودى أول سنة ليه فى رمضان على تويتر وفيس بوك مع بعض فا ربنا يتقبل منى يارب
كل رمضان وإنتم طيبين J
مع العلم إن التدوينة دى كتبتها السنة إللى فاتت لشباب الفيس بوك, بس تم تعديل بعض النقاط وإعادة صياغة الكلام حتى يتماشى مع الجو العام لشباب التويتر!

4 comments:

  1. hi,الاول كل سنة وانتى طيبة بس كنت عايز اسالك هو مين ابن حنيل وابن حنيفة دول بتوع كنافة وكدة ولا اية المهم تعملى اللى انتى كاتباة فوق دة وانا احاول اعمل شوية منة وبس اشوفك بعد عيد الخروف عشان انا مش بحب الكحك , happy rmdan to you.

    Titoo

    ReplyDelete
  2. كل سنه وانت طيبه مع انك بتصومى لحد الظهر بس ياللا
    تويتر مكروه بس مش حرام
    والمفروض اى نشاط فى رمضان يتم منعه بمعنى
    الناس تنام على ظهرها ورجليها فى الهوا لحد ما المغرب يأذن

    ReplyDelete
  3. تيتو: كل سنة وإنت طيب وياريت متركزش معايع فى الكلام...ابن حنيفة ده كان واحد كُوبارة وزى الفل, هبقى أعرفك عليه (غلطة مطبعية ونأسف للإزعاج)...وأنا بحاول برضه أعمل شوية منه وربنا يتوب علينا جميعا يا رب

    رأفت: كل عام وأنت والجالية الإسلامية إللى فى الغربة بخير. أحب أوضحلك شوية نقط: أولا البوست دى كان السبب فيها حضرتك, علشان التعليق بتاعك على البوست اللى فات..ماكنتش ناوية أكتب, بس شجعتنى لما قلت إنه مفيش بوست جديد ولا إبه. ثانيناً: أنا مخففة الشروط للناس اللى عايشة بره برضه علشانك, أصل يا حرام الحكومة عندكوا مش بتأخر الساعة زى عندنا...وأخيراً, أنا موافقة أكيد على مبدأ النوم وممكن أعمموا طول السنة كمان...النوم سلطان

    ReplyDelete
  4. الامام ابوحنيفه والامام أحمدبن حنبل هم أعلي وأرقي من اننا ننكت عليهم اقري كويس واعرفي الناس دي مين وقدمت ايه للدين .

    ReplyDelete