Who we are?

My photo
Giza, Egypt
Oh I come from a land, from a far away place…where a caravan camels roam...Where it's flat and immense and the heat is intense…it’s barbaric but hey...its home

1.27.2011

ليه أنا بطلب التغير



ناس كتير ممكن تسأل ليه أنا بطلب التغير؟ ليه واحدة زى عمرها ما قابلت مشكلة فى حياتها فى البلد دى تكون عايزاها تتغير؟ ليه واحدة دخلت مدارس لغات كان فيها ولاد أنكل ماعرفش مين وطنط اسمها إيه دى تطالب ان الحكومة لازم تتغير؟ ولا يكونش المشاكل قابلتها لما دخلت الجامعة الأمريكية إللى على رأى محمد هنيدى "الجامعة الأمريكية، أشيك شباب فى مصر" هى إللى خلتنى مش طايقة البلد؟

حقيقي ماعنديش سبب يخلينى أطلب التغيير غير إنى بعد شهور توقف عن الكتابة قررت إنى أفتح الكمبيوتر وأبتدى أكتب إللى حاسه بيه. حاسه بإيه؟ حاسه بخنقة وقرف وزهق ومستقبل مش باينله ملامح. حاسه إنه مافيش فايدة ولما يكون أولها مافيش فايدة، أخرتها أكيد حاجة ملهاش ملامح!

خلونى أحكيلكم حوار دار ما بينى وبين واحد من الطبقة المتوسطة التى تكاد تنقرض فى مصر. ابتدا الحوار طبعا بهجوم عليا إنى "برجوازية متعفنة" وماتقلقوش دى مش شتيمة، بس المصطلح ده بيطلق على كل من عاش عيشة كريمة فى البلد دى. المهم الولد قال: "إنتِ أصلا حاسه بالناس ولا شوفتى هما عايشين إزاى ولا البهدلة إللى بتحصلهم؟ مهما كنتِ نزلتى الشارع أو إحتكيتى بالناس، عمرك ما هتحسي قد إيه الناس تعبانة لأنكم أصلا مش حاطينهم فى بالكم. كل همكم إن شركة "دادى" تدخَل الكام مليون بتوع كل سنة علشان نصرفوا منهم براحتكم". طبعا أنا ابتديت أهاجم أنا كمان وأدافع دفاع مستميت عن برجوازيتى وقولت: "إنت ليه تحكم عليا بالظاهر أصلا ولا ليه تقول إنى مش حاسه بالناس أو مش بعمل لمصلحتهم؟ أكيد حاسة بيهم بس مش لازم أطلع كل الفلوس إللى معايا صدقة للفقرا وأمشي أقول أنا بعمل إيه للغلابة." وطبعا أخدتنى الجلالة وحكيت كام موقف طلعت فيها فلوسي كلها لله وإزاى زنقت على نفسي علشان أكمل باقى الشهر من غير فلوس بعد ما طلعت منها لناس كانت محتاجة. رد وقالى: "برافو والله إنت هايلة إنك بتعملى كده مش زى ناس كتير حتى مش بيفكروا يعملوا للغلابة حاجة" طبعا فى إعتقادى إنى كده أفحمته وخلاص أنا إللى كسبت المباراة. بس وإحنا بنلعب فى الوقت الضايع، دخل الجون إللى ماكنتش عاملة حسابه و راح قال: "مش هو ده إللى إنت عايزة تسمعيه؟ إنت عايزة حد يحسسك قد إيه إنت كويسة وبنت ناس وحاسة بالغلابة؟ كل البرجوازين عندهم نفس المنطق ده، منطق مش مهم إحنا بندى الناس مرتبات عاملة إزاى، ولا أجور ماتنفعش تعيش واحد منكم يوم واحد بس. المهم إنه فى الأخر نديهم قرشين كأنهم حسنة مننا ونقول ما أهو إحنا بندى كتير أهو. بكده نبقا إدينالهم إللى يستحقوه وكمان بالمرة نحس أننا كويسين وبندى لله كتير".

فكرت فى كلامه وقولت يمكن يكون فيه جزء من الحقيقة. يمكن إحنا مش شايفين الناس عايشة إزاى بجد. جايز لو كل واحد طالب بحق الناس التانية المطحونين فى البلد كانت الدنيا إتغيرت كتير. لو كل واحد أخد حقه فعلا يمكن كانت مصر بقيت أحسن كتير. بس هل لو الواحد طالب بحق الناس التانية, أنا مين هيطالب بحقى؟ محتاجين حد يطالب بحقوقنا كلنا زى بعض, حد يقف معانا كلنا من غير أى فروق ما بينا. علشان كده انا عايزة التغير وعايزة حكومة تقف مع الغفير قبل الأمير. يمكن أكون مش بسعى لده ويمكن يكون جزء منى خايف من التغير بس هو لازم يجى مهما حصل علشان إللى بيحصل ظلم ليا قبل أى حد تانى.