Who we are?

My photo
Giza, Egypt
Oh I come from a land, from a far away place…where a caravan camels roam...Where it's flat and immense and the heat is intense…it’s barbaric but hey...its home

7.02.2010

عشرون عاماً أفكار إنتحارية

ياااااااااه، ٢٠ سنة مروا علي أول مرة فكرة الانتحار تييجي في بالي! تخيلوا كان عندي كام سنة أنا وقت لما كنت بفكر في الانتحار! أنا متخيلة الصدمة علي وجوه ناس كتيرة وهما بيعرفوا لأول مرة اني فكرت انتحر في يوم من الأيام! بس اللي هما مش عارفينه ان الفكرة مش بعيدة قوي دلوقتي. أصلها ماكنتش فكرة جات لي في لحظة إحباط أو طيش. لأ، هو من الواضح ان تفكيري وتركيبتي الشخصية بتحب الهروب من الواقع واختيار الحل الاسهل والمريح دائما! فا الإنتحار أكيد أسهل طريق للخروج من كل المشاكل اللي ممكن تقابل الواحد

بجد ندمانة أشد الندم اني ما انتحرتش وأنا لسه صغيرة. كنت علي الأقل وفرت تعب ومجهود ودوشة وفلوس ومكان وحاجات كتيرة قوي عليا وعلي الناس اللي حواليا. لأ وكمان كنت هدخل الجنة من غير حساب....ما أنا طفلة بقي ومش محسوب عليا أي حاجة بعملها. الغباء بقي هو اللي خلاني اتراجع عن اني فعلا انتحر! وممكن يكون كسل برضه! كل لما أجي أقول هنتحر، أقول في بالي لا لا لا....أنا هستني كده لحد لما أكبر وابقي في ييجي ٥ ابتدائي علشان أكون بعرف اكتب كويس وأقدر اسيب لأهلي جواب أودعهم فيه

Suicideوسنة تجر سنة، وأنا قاعدة في سريري بليل وبتخيل نفسي فوق سطوح بيتنا وطالعة علي  السور وبرمي نفسي خلاص من فوق…ودايما مخي يقول لي وأنا بتخيل الموقف “ما أنا مش هفرق معاهم لو انتحرت” عادي عندهم استبن كتير غيري! بس دايما بأتراجع عن الفكرة والسبب أهبل منه مفيش…علشان قال ايه مش بعرف أكتب لسه وإكمني حنينة وطيبة ماهانش علي أموت نفسي من غير ما أكون سايبة كلمتين يفتكروني بيهم! لحد لما خلاص كنت قربت أعرف اكتب جواب زي الفل والإنتحار كان الأبواب وحلم هيتحقق..وحد الله يسامحه مش فاكرة مين، قرر يقول لي ان الانتحار حرام!

يادي النيلة!!!!!! يعني أنا قاعدة ده كله، أتخيل الواقعة بتاعتي من فوق السطوح وييجي حد كده بمنتهي السهولة يقول لي أصل الانتحار حرام! وبعدين مش يكمل بقي ويقول انه الأطفال ملهمش حساب، لأ أنا كده خلاص عرفت انه حرام فا الطبيعي انه حرام عليا حتي لو لسه طفلة

ودي كانت نهاية أول وأغلي وأعز أمنية عندي! وكبرت والأفكار القديمة لسه بتراودني، بس مع الأسف النازعة الدينية عندي بتمنعني من اني إعمل حاجة زي دي

أنا بس حبيت أحتفل بالذكري ال20 معاكم علي أول مرة أفكر فيها في الانتحار… وبالمرة أوجه كلامي لكل أم وأب وأقول لهم متقللوش من عقول عيالكم! اللي انتم فاكرنهم لسه مش فاهمين حاجة، ممكن يكون عندهم أفكار تودي في داهية وبيفهموا اكتر من أي واحد عنده ١٠٠ سنة! فا رجاءاً إتكلموا مع أولادكوا وإعرفوا مشاكلهم . وحتي إحكوا لهم علي مشاكلكوا علشان ده ممكن يفهمهم انتوا ليه بتزعقوا لبعض علي مصروف البيت مثلا! ووقتها هيعرفوا ان السبب مش منهم وان الدنيا وحشة وده الطبيعي إن الناس بتتخنق وبطلع من شعورها, بس رغم كل المشاكل لسه بتحبوهم. يعني عاملوهم زي حد كبير وعقله كبير

في النهاية أحب أقول اني الحمد لله مش عندي عقد نفسية قوي....يعني عندي العقد الطبيعية زي اللي عند كل الناس! وبحب الدنيا معظم الوقت وبشوف الناس كلها طيبة! بس مايمنعش ان أفكار الطفولة بتجييلي من وقت للتاني

suicide-bear

43 Things Tags:

10 comments:

  1. hahahha fakrteni benafsi...bas ana ba2a kan nefsi atafash mn elbeit..ahrab fi ay 7eta...we kont 7asah en mesh momken 7ad yel2eeni l2an el balad kebeera we was3a...kont mot7'ayela en momken a3esh lwa7di we asht3'al ay 7aga we 7'alas.
    Modo3 el2ent7ar dah ba2a gali 3ala kabar...we 27yanan byl7 3ala kol fatra.
    Nothing is better than childish dreams

    ReplyDelete
  2. هههههههههههههه

    ايه ده هو الناس كلها بتفكر زي بعض ولا ايه؟ انا برضه فكرة اني اهرب واسيب البيت كانت علي بالي كتير...بس ده بعد ما فكرةالانتحار طلعت حرام! ده كان الحل التاني بعد كده

    وكنت برضه بشوف اني ممكن اشتغل واصرف علي نفسي....بس كنت ناوية اروح اي محافظة تانية غير القاهرة علشان ابقي ضمنت اكيد اني محدش يعرفني هناك! بس عمري ما اخدت الخطوة دي مع الاسف برضه!

    الانتحار صدقيني لولا انه حرام...كنت عملته من زمان لانه اكيد بييجي علي بالي لحد دلوقتي! ده عشرة عمر

    ReplyDelete
  3. بصرة هاهاهاهاههاهاهاهاههاها

    ReplyDelete
  4. ايه الافكار الهباب دى..انا جيت منطقه غلط.. الايام الحلوه جايه

    ReplyDelete
  5. Well Raafat, you are living in a country where the President's campaign had the slogan of "yes we can".....but here we are facing a "No you can't, but yes I will" situation!!
    So I hope you can see the difference + dont blame me for seeing a gloomy picture, blame my childhood memories! hehe
    بعدين يعني هو الانتحار حاجه وحشة؟ ده شئ مريح! وجع ساعة ولا كل ساعة! او علي الاقل هتعذب بس اكون عارفة ليه العذاب!

    ok ok....so now i am starting to give u a more gloomy picture while in fact i am a very optimistic person who still believes in "world peace"....but i am just trying to balance out my optimisim with a little bit of a dark thoughts! hehehe

    ReplyDelete
  6. عارفين حاجة كلوكو كدة مححسنى انى قاعد فى مصحة نفسية بجد انتو عقولكو فيها حاجة غلط (اللى عايزة تنتحر واللى عايز يسيب البيت مع ان تسيب البيت دة المفروض يحصل عادى كدة من غير ميكون فى سبب عشان تعتمد على نفسك وتعيش حر) بس انا اعتقد ان كل واحد فى الدنيا عايش عشان حاجة اكيد بعد عبادة ربنا طبعا واللى مش عارف هو عايش لية او مش لاقى حاجة يعيش عشنها يتشيخ بقة او يترهبن بس كدة

    Titoo

    ReplyDelete
  7. لما نستشيخ او نترهبن هو الحل لما الواحد يكون مش عارف هو عايش ليه, يبقي ربنا يستر علي الرموزالدينية في حياتنا!

    اما عن أفكار الانتحار أو ان الواحد يسيب البيت فا ده مش معناه ان الواحد معقد نفسيا أو عنده إكتئاب أو فعلا هيعمل كده. لأ كل واحد عنده عقده ومشاكله وافكاره الغريبة...مع إختلاف النسب من شخص للتاني. وطبيعي جدا ان الواحد بيعدي في مراحل كتير من حياته بمشاكل كتيرة (مشاكل مادية, معنوية, عاطفية, دراسية...الخ) ووقتها بيحس انه عايز يهرب من كل حاجة ويبعد عن اي مشاكل! أنا طريقتي في حل المشاكل اني أحل بشكل جزري يخليني أخلص من المشكلة الحالية وأي مشكلة ممكن تقابلني في المستقبل!

    والحمد لله الواحد أكيد بيؤمن بربنا جداً وأكيد عارفة اني عايشة لسبب معين بس من وقت للتاني السبب بيتوه وبيقع في وسط القرف! بس بعد شوية الواحد بيعيد ترتيب أفكاره وبيبني أهداف وأولويات تانية تعرفني الهدف من الحياة!

    لو حضرتك معندكش مشاكل وعارف انت عايش ليه وعلاقتك بربنا كويسة طووووووووووول الوقت يبقي اسمحلي احسدك علي النعمة اللي انت فيها واحمد ربنا علي اللي انت فيه!

    ReplyDelete
  8. للأسف من زمان و أنا عارف إن الإنتحار حرام.
    لكن مازال جزء مني يريد الإنتحار، فأحياناً أفقد الهدف في الحياة.

    لكني أهوة عايش ;D

    ReplyDelete
  9. هو لسه بوست الانتحار ده موجود؟؟؟ ازاى حد يفكر فى الانتحار وهو يقدر يتفرج على عمرو اديب ويقرا لعبدالله كمال وكرم جابر وممتاز القط ..كل العظماء دول متاحين لك 24 ساعه انماانا متغرب وباعانى عبل ما الاقى اى حاجه لهؤلاء..ههههههه
    اكتبى حاجه تانيه بقى

    ReplyDelete
  10. أنا بقى عمرى مافكرت في الانتحار خالص ولا فكرت أطفش من البيت، دايما عندى حلم إن أي حاجة كانت ناقصة عندى أعوضها في بيتى أنا .. Nice post :)

    ReplyDelete